 Á fundi stjórnar Sambands íslenskra sveitarfélaga 10. október 2008 var eftirfarandi samþykkt gerð: Stjórn Sambands íslenskra sveitarfélaga beinir því til allra sveitarstjórna landsins að huga vel að samhæfingu starfshátta og viðbragða stofnana sinna og starfsfólks sem með einum eða öðrum hætti koma að velferðarþjónustu íbúa. Forsvarsmenn félagsþjónustu, skóla, heilsugæslu, kirkju, íþrótta- og tómstundamála og löggæslu þurfa að stilla saman strengi sína í þágu velferðar íbúanna.
Stjórnin tekur heils hugar undir tilmæli Lýðheilsustöðvar þar sem hvatt er til þess að huga vel að velferð barna og ungmenna á þessum tímum umróts og óöryggis og hvatningu menntamálaráðherra til skólastjórnenda allra skólastiga að þeir ræði við starfsfólk sitt og hvetji það til að hlúa að nemendum. Skoða þarf hvaða sérfræðiþjónusta, þekking og úrræði eru fyrir hendi bæði innan skóla og sveitarfélags til þess að styðja sem best við börn og fjölskyldur.
Stjórn Sambands íslenskra sveitarfélaga lýsir jafnframt yfir vilja sínum til að eiga áfram samráð við menntamálaráðuneytið um samstilltar aðgerðir í skólum landsins til þess að bregðast við þeim vanda sem nú er uppi.
| 
