Á 10 ára afmælishátíð Markaðsstofu Austurlands, sem haldin var á Hótel Héraði laugardaginn 7. mars sl., voru veitt hin eftirsóttu Frumkvöðlaverðlaun. Frumkvöðullinn er veittur þeim sem sýnt hafa áræðni og hugmyndaauðgi við uppbyggingu á þjónustu fyrir ferðamenn og stuðlað með verkum sínum að aukinni fjölbreytni í atvinnugreininni á Austurlandi. Meðal þeirra sem fengið hafa þessa viðurkenningu eru Lagarfljótsormurinn, Fransmenn á Íslandi, Ferðamálahópurinn á Borgarfirði, Skriðuklaustur og Klaustursel, sem fékk viðurkenninguna í fyrra.

Í þetta sinn var Frumkvöðullinn veittur fuglaskoðunarverkefninu birds.is á Djúpavogi. Albert Jensson veitti viðurkenningunni viðtöku á afmælishátíðinni á laugardaginn.

Upphaf verkefnisins má rekja allt til ársins 2002 þegar Ferðamálanefnd Djúpavogshrepps vann að því að greina helstu sérkenni fyrir Djúpavogshrepp, með tilliti til eflingar á ferðaþjónustu. Það var mat nefndarinnar að fjölskrúðugt fuglalíf í Djúpavogshreppi væri eitt af sérkennum svæðisins. Árið 2005 fór vinna við verkefnið á fullan skrið með stuðningi frá Útflutningsráði Íslands og var þá skipaður sérstakur starfshópur um verkefnið, með vinnuheitinu Birds.is.

Svæðið í kringum Djúpavog þykir henta sérstaklega vel til fuglaskoðunar en hér eru mörg mikilvæg búsvæði og viðkomustaðir margra fuglategunda. Umhverfi vatnana á Búlandsnesi er mjög aðgengilegt og þar er fuglalíf fjölskrúðugt. Farfuglarnir koma í stórum hópum, fyrst upp að Suð-Austurlandi og fara síðast frá Íslandi af þessu sama svæði. Ennfremur má hér sjá umtalsvert af flækingsfuglum.

Helstu markmið verkefnisins er að auka á fjölbreytni í ferðaþjónustu á svæðinu og vinna að því að lengja ferðamannatímann, jafnframt því að auka áhuga almennings á fugla- og náttúruskoðun.

Umtalsvert starf hefur verið unnið í markaðssetningu, þá helst með uppsetningu á heimasíðu verkefnisins www.birds.is. Samhliða því hefur verið byggt stórt fuglaskoðunarhús við vötnin á Búlandsnesi, svo og sett upp hús fyrir smáfugla í Hálsaskógi, gefinn út bæklingur og fuglagreiningarlisti ásamt öðrum sérmerktum vörum með merki Birds.is. Enn fremur hafa verið sett upplýsingaskilti á völdum stöðum um þá fugla sem er að finna í nágrenni Djúpavogs, svo og kort af svæðinu.

Síðastliðið vor var Landsmót áhugamanna um fuglaskoðun haldið á Djúpavogi og var þá greind 61 fuglategund á einum degi á svæðinu við Djúpavog.

 
Stoltir frumkvöðlar - Albert Jensson, Kristján Ingimarsson og Þórir Stefánsson