Í morgun kl 7:00 lagðist skemmtiferðaskipið M/S Endeavour að bryggju í Innri Gleðivík. Þetta mun vera í fyrsta skipti sem skemmtiferðaskip leggst að bryggju þar en þegar skemmtiferðaskip hafa komið hafa þau legið við akkeri út á firði og léttabátar hafa flutt fólk í land. M/S Endeavour er eitt minnsta skemmtiferðaskipið sem heimsækir Ísland á þessu ári en farþegar eru 110 og 74 eru í áhöfn og reiknað er með að flestir farþeganna heimsæki Jökulsárlón. Skipið er væntanlegt aftur hingað þann 20. júní og annað skemmtiferðaskip, M/S Maasdam, er væntanlegt 17. júlí. Skipakomur af þessu tagi hafa alltaf sett skemmtilegan svip á bæjarlífið og vonandi hefur þetta jákvæð áhrif hjá þeim sem bjóða upp á þjónustu og afþreyingu fyrir ferðafólk.