Fréttir
30.08.2007 - Pabbinn á Djúpavogi
 



Laugardaginn 1. sept nk. verður hin geysivinsæla leiksýning "Pabbinn" sett upp á Hótel Framtíð á Djúpavogi. Þetta er eins manns sýning þar sem Bjarni Haukur Þórsson fer á kostum. Bjarni Haukur er eflaust þekktastur fyrir eins manns sýninguna "Hellisbúinn" en hún er ein af mest sóttu leiksýningum allra tíma á Íslandi.

Nánar um "Pabbann":

---

Þar til fyrir stuttu hefur hlutverk feðra, í uppeldi barna, eiginlega verið talið óþarft. Í hundruð ára trúði fólk því að konur, einfaldlega vegna eðlisávísunar þeirra, væru mun hæfari í að ala upp börn. Þær væru nú með réttu græjurnar og svona. En nútíminn er allt annar: heimurinn breyttist. Heimilin breyttust. Kynjamunurinn minnkaði. Núna er sagt að karlmaður, sem tekur virkan þátt í og axlar ábyrgð á uppeldi barna sinna, hafi gríðarleg áhrif (jákvæð!) á börnin, heimilið og heiminn. En af hverju líður flestum karlmönnum samt eins og þeir þurfi að ljúka BA-námi í „föðurfræðum” í hvert skipti sem þeir halda á börnunum sínum?

Barnauppeldi er frumskógur. Karlmenn eru kannski í fyrsta sinn að kynnast því af fullri alvöru. Og sennilega kominn tími til. En það gerist ekki sársaukalaust!

Leikverkið er einleikur eða „one-man-show” þar sem Bjarni Haukur bregður sér í ýmis líki og veltir því fyrir sér hvað það er að vera pabbi. Hvers vegna eignumst við börn? Það er ekki eins og það vanti fólk. Það er til nóg af fólki. Og vanti okkur fólk, flytjum við það inn. Er þetta ást? Sjálfselska? Eða finnst okkur bara svona gott að geraða? Er meðgangan kannski ekkert annað en sogblettur fullorðna fólksins?

Leikverkið er frásögn þar sem Pabbinn fjallar um aðdraganda þess að hann og konan hans ákváðu að eignast barn. Hvað gerist á meðgöngunni og við undirbúning fæðingarinnar. Fæðingunni og fyrstu skrefunum eru gerð góð skil þegar heim er komið. Allt er séð frá sjónarhóli karlmannsins. En að lokinni meðgöngunni, fæðingunni og fyrstu skrefunum tekur við næsta tímabil, sennilega það lengsta: Uppeldistímabilið. Og það er oft þá, þegar barnið byrjar að ganga, að aðrir hlutir hætta að ganga — eins vel, til dæmis hjónabandið. En þegar öllu er á botninn hvolft eru pabbar að gera hluti í dag sem þóttu óeðlilegir áður. Nú taka þeir ábyrgð á uppeldinu og sinna börnunum. Og kannski eru pabbar fyrst að fatta það núna hvað þeir hafa farið á mis við?

Pabbinn er drepfyndið og hjartnæmt nýtt íslenskt leikrit sem fjallar um það sem skiptir einna mestu máli í lífinu.

---
Leiksýning hefst kl. 20:30, miðaverð er kr. 2.900 og miðasala hefst kl. 18.00 á Hótel Framtíð á sýningardag.

Hægt er að fræðast meira um sýninguna, Bjarna Hauk og lesa gagnrýni á heimasíðunni www.pabbinn.is

ÓB




Veðrið í dag
Veðurstöðin Papey kl.07:00:00
Hiti:1,3 °C
Vindátt:NNA
Vindhraði:18 m/sek
Vindhviður:24 m/sek
 
 
Veðurstöðin Teigarhorn kl.07:00:00
Hiti:-0,1 °C
Vindátt:N
Vindhraði:4 m/sek
Vindhviður:7 m/sek
 
 
Veðurstöðin Hamarsfjörður kl.07:00:00
Hiti:0,0 °C
Vindátt:VSV
Vindhraði:2 m/sek
Vindhviður:5 m/sek
 
 
Flóð og Fjara: 29.3.2024
smþmffl
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            
Fjölmenningarsetur
Fiskmarkaður Djúpavogs
Ísland.is