Fjölmiðlafárið hér á Djúpavogi virðist engan endi ætla að taka. Við á heimasíðunni erum búin að vísa í fjöldamörg sjónvarps- og útvarpsviðtöl við Djúpavogsbúa sl. mánuði eins og lesendur hafa væntanlega ekki farið varhluta af. Nú síðast í gær mætti Edda Óttarsdóttir, fréttaritari svæðisútvarps Austurlands, hingað á Djúpavog og tók viðtal við Ella og Bigga í Ósnesi um mótvægisaðgerðir ríkisstjórnar við skerðingu þorskkvóta.
Viðtalinu var sjónvarpað í kvöldfréttum sjónvarps í gær og fréttina má nálgast með því að smella hér .
Ekki nóg með það. Ásgrímur Ingi Arngrímsson sló í gær á þráðinn til Bj. Hafþórs Guðmundssonar, sveitarstjóra Djúpavogshrepps og formanns Sambands sveitarfélaga á Austurlandi, til að kanna viðbrögð hans við mótvægisaðgerðum ríkisstjórnar.
Viðtalinu við Hafþór var útvarpað í svæðisútvarpi Austurlands í gær og má nálgast það með því að smella hér . Við getum ekki vísað beint í viðtalið, heldur einungis þáttinn sjálfan og því verða lesendur að "spóla" vel inn í miðjan þáttinn til að heyra viðtalið. ÓB |