Sýning um austfirska kvenljósmyndara 1871-1944 verður opnuð í Tryggvabúð miðvikudaginn 27. janúar kl. 15:00.

Höfundur sýningarinnar, Magnea Bára Stefánsdóttir, mun opna sýninguna og halda stutta kynningu á henni. Sýninguna vann hún sem hluta af lokaverkefni sínu í hagnýtri menningarmiðlun frá Háskóla Íslands.

Fjallað er um þær konur sem menntuðu sig í greininni, tóku myndir á Austurlandi eða störfuðu á ljósmyndastofu á sama svæði. Tímabilið sem rannsóknin nær yfir er frá árinu 1871 þegar fyrsta konan hóf ljósmyndanám allt til ársins 1944 þegar ljósmyndastofa Eyjólfs Jónssonar á Seyðisfirði hætti starfsemi, en við þá stofu unnu margar þeirra kvenna sem eru til umfjöllunar
Leitað var heimilda um ævi, störf og verk þessara kvenljósmyndara. Ennfremur voru dregin fram helstu atriði í sögu ljósmyndunar, þær aðferðir sem notaðar voru og hvaða þátt konur áttu í þeirri þróun. Þessu tengist umræða um stöðu og hlutverk þeirra í samfélaginu. Auk þess er sagt frá varðveislu ljósmynda á Austurlandi og ljósmyndasöfnum þar.

Nicoline Weywadt á Teigarhorni var fyrsta íslenska konan sem lærði ljósmyndun og stundaði sjálfstæðan atvinnurekstur í greininni. Þrettán aðrar konur eru til umfjöllunar: Anna Klausen Eskifirði, Anna Ólafsdóttir Mjóafirði, Emelía Blöndal Seyðisfirði, Hansína Björnsdóttir Teigarhorni, Kristbjörg Stefánsdóttir Seyðisfirði, Lára Ólafsdóttir Reyðarfirði, Margrét Möller Eskifirði, Margrét Ólafsdóttir Seyðisfirði, Salvör Kristjánsdóttir Seyðisfirði, Sigríður Jensdóttir Seyðisfirði, Solveig Einarsdóttir Seyðisfirði, Svanborg Sigurðardóttir Seyðisfirði og Svava Eyjólfsdóttir Seyðisfirði.

(Úr lýsingu á verkefninu. Hægt er að nálgast ritgerð Báru hér)

Sýningin mun hanga uppi í Tryggvabúð til loka febrúarmánaðar.