Eitthvað hefur það fyrirfarist að birta svar við gátu þeirri er við vörpuðum fram 28. september sl., en svar við henni átti að birtast hér á heimasíðunni föstudaginn 5. okt. Úr því verður nú bætt. Vísan sem er eftir Ingibjörgu Jónasdóttur á Runná var svohljóðandi (lausnarorðið fyrir aftan hverja línu):

Fyrrum beinum flengdust á, (gandreið)
fjórum nú á hjólum. (bifreið)
Fætur sex á ferð um snjá, (útreið)
fiskur á norður-bólum. (reyð (silungur er kallaður reyð í Mývatnssveit))
IJ

Lausnarorðið er semsagt reið.
Eftir því sem undirritaður kemst næst (sem þýðir að hann er búinn að leita hátt og lágt að, velta við hlutum, ganga berserksgang og allt þar á milli til að finna innsend svör) þá var bara eitt svar sent inn. Það var frá Baldri og Svandísi sem höfðu rétt fyrir sér.

----

Þá er komið að nýrri gátu og er hún að þessu sinni eftir Guðmund í Sæbakka. Lausnarorðið kemur fyrir í hverri línu fyrir sig og er ýmist nafnorð eða sagnorð.

Fór til veiða, felldi dýr.
Á fimbul, ríkja svæðum.
Unaðsreitur, ávallt hlýr.
Öðrum ber af klæðum.
GG

Svör sendist á djupivogur@djupivogur.is eigi síðar en fimmtudaginn 18. október.

ÓB