Eins og fram kom á aðalvef Djúpavogshrepps í gær fórum við Aron Daði til Reykjavíkur sl. mánudag. Tilgangurinn var að veita viðtöku verðlaunum fyrir 1. sætið í ritgerðarsamkeppni fyrir verkefnið "Heimabyggðin mín", - Hvernig getum við stuðlað að betri heimabyggð okkar? Athöfnin sjálf var mjög ánægjuleg og menntamálaráðherra, frú Þorgerður Katrín Gunnarsdóttir, flutti ávarp og afhenti verðlaunin. Í öðru sæti í samkeppninni varð Helga Hansdóttir frá Hrafnagilsskóla í Eyjafirði og í þriðja sæti varð Lydía Angelíka Guðmundsdóttir frá Hofgarði í Öræfum. Allir vinningshafar voru mættir, ásamt skólastjórum og aðstandendum.
Nú á vorönninni þurfa nemendur að vinna hópverkefni sem felst í því að fullvinna einhverja af þeim hugmyndum sem fram komu í ritgerðasamkeppninni og höfum við hér í skólanum nú þegar ákveðið í hverju verkefnið okkar muni felast. HDH |