Reykjavík, apríl 2008

Eitt helsta markmið fræðsludeildar Þjóðleikhússins er að rækta upp nýja leikhúsáhorfendur, m.a. með því að styrkja leiklistina sem sjálfstæða kennslugrein í skólum landsins. Þetta höfum við hingað til gert m.a. með námskeiðahaldi fyrir kennara, útgáfu fræðsluefnis tengt sýningum leikhússins, með því að halda úti heimasíðu þar sem áhersla er lögð á leiklistarkennslu, móttöku skólahópa, o.fl.  
 
Í verkefninu Þjóðleik göngum við skrefinu lengra og viljum bjóða skólum (ásamt leikfélögum og tómstundahópum) upp á þjónustu sem ekki er fordæmi fyrir að veitt hafi verið hér á landi: Beinan stuðning við uppsetningu leiksýninga, þar sem Þjóðleikhúsið leggur til glæný íslensk leikverk og faglega ráðgjöf.

Fyrirmyndin að Þjóðleik er sótt til Bretlands, þó okkar útgáfa sé töluvert mikið einfölduð.  Breska Þjóðleikhúsið hefur nú um árabil boðið upp á árlega leiklistarhátíð ungs fólks sem þeir kalla Connections. Í hvert sinn eru skrifuð 10 ný verk fyrir ungt fólk, og mikið lagt undir á hverju ári.  Þjóðleikhúsið hefur verið í virkum samskiptum við forsvarsfólk og stjórnendur Connections, og upp hafa komið hugmyndir um að tengja hátíðirnar jafnvel á einhvern hátt þegar fram í sækir.

Hér á eftir fer stutt lýsing á verkefninu og yfirlit yfir helstu markmið þess. Allar nánari upplýsingar veitir undirrituð.

Með kveðju,

Vigdís Jakobsdóttir
Verkefnastjóri fræðslustarfs Þjóðleikhússins
vigdis@leikhusid.is
 
 
Stutt lýsing:

•    Þjóðleikhúsið fær til samstarfs þekkt íslensk leikskáld og efnir til lokaðrar samkeppni um 2-3 ný leikverk fyrir unga leikara (13-20 ára). Ekki yrði um að ræða fræðsluverk eða forvarnaverk heldur alvöru safaríkan leiktexta fyrir ungt fólk án predikunartóns sem því miður oft einkennir verk skrifuð fyrir unga leikara.

•    Verkefnið yrði auglýst á Austurlandi og er opið öllum hópum ungs fólks, svo lengi sem að minnsta kosti ein fullorðin manneskja sé í forsvari og gegni hlutverki leiðbeinanda. Stefnt er að því að fá 6-8 hópa í verkefnið.

•    Haldið verður ókeypis námskeið fyrir leiðbeinendur hópanna  í Þjóðleikhúsinu að hausti. Þar verður farið í undirstöðuatriði leikstjórnar, sviðsmyndahönnunar og lýsingar.  Leiðbeinendurnir fá líka tækifæri til þess að hitta og spjalla við höfunda og þýðendur verkanna sem um verður að velja. Hver stjórnandi fer svo burt með eitt af leikverkunum til uppsetningar með sínum hóp. Stjórnendur verða hvattir til þess að halda sambandi yfir veturinn og bera saman bækur sínar.

•    Atvinnuleikstjórar, leikmyndateiknarar og ljósahönnuðir á vegum Þjóðleikhússins verða stjórnendum verkefnanna til stuðnings á æfingaferlinu í gegnum tölvupóst og símleiðis. Hugsanlegt er einnig að leikstjórar og e.t.v. ljósahönnuður fari á hvern stað og aðstoði kennara í t.d. eina viku á æfingaferlinu.

•    Hóparnir ráða sjálfir hvenær þeir sýna verkin sín í sinni heimabyggð/skóla, en stefnt er að uppskeruhátíð (leiklistarhátíð) þar sem hóparnir koma saman og sýna hver öðrum afrakstur vinnunnar að vori.  

•    Samhliða uppskeruhátíðinni verður boðið upp á málþing um verkefnið þar sem leiðbeinendur og þátttakendur í verkefninu eru í forgrunni.  

Markmið Þjóðleiks:

•    Að efla leiklistarlæsi ungs fólks með því að hvetja til metnaðarfullra uppsetninga þar sem þau eru sjálf í aðalhlutverki og auðga þar með menntun þeirra.
•    Opna dyr leikhússins fyrir aldurshópi sem oft upplifir sig vanræktan í leikhúsi.
•    Opna dyr Þjóðleihússins fyrir áhugaleikhúsfólki.
•    Opna dyr leikhússins enn betur en nú er fyrir þeim kennurum sem vilja sinna leiklistarkennslu í skólum.
•    Efla íslenska leikritun.
•    Tengja Þjóðleikhúsið við landsbyggðina á gagnvirkan hátt.