Nú hefur formlega tekið til starfa nýr Ferða- og menningarmálafulltrúi Djúpavogshrepps, Bryndís Reynisdóttir, sem er borinn og barnfæddur Djúpavogsbúi. Varð hún ung að aldri þekkt fyrir að vera að einum þriðja hluta þátttakandi í fyrstu þríburafæðingu á Djúpavogi og hefur spjarað sig vel æ síðan.

Bryndís hefur reyndar verið í hlutastarfi síðan í júní, en hún var á sama tíma að klára BS í viðskiptafræði við Háskólann á Bifröst.

Bryndís hefur unnið við ferðaþjónustu, m.a. á Djúpavogi, dvalið við nám á Spáni og numið tungur ýmissa þjóða.
Full eining var um ráðningu hennar, en hún var valin úr hópi vel hæfra einstaklinga. Var, auk góðrar menntunar hennar, litið til þess að hún þekkir vel til í greininni og á svæðinu, sem verða mun helzti starfsvettvangur hennar.

Sveitarstjórn og heimasíðan bjóða Bryndísi að sjálfsögðu velkomna til starfa um leið og forvera hennar, Kristjáni Ingimarssyni eru færðar þakkir fyrir störf hans á þessum sama vettvangi.

Texti: ÓB / BHG

Mynd: ÓB