Nemendum 10. bekkjar stóð til boða í haust að taka þátt í leik á vegum Landsbanka Íslands sem heitir Raunveruleikurinn. Í þessum leik, sem nemendur vinna á netinu, eiga þeir að setja sig í spor tvítugra ungmenna og taka ákvarðanir um það hvernig þeir ætla að eyða næstu árunum. Leikurinn var spilaður í fjórar vikur og fengu nemendur ný verkefni á hverjum degi. Öll verkefnin tengjast þeim áskorunum sem ungt fólk í dag þarf að glíma við, t.d. varðandi námslán, íbúðakaup, barneignir, frístundir, skatta o.fl. Skemmst er frá því að segja að einn nemandi í Grunnskóla Djúpavogs, Jóhann Atli Hafliðason hlaut þriðju verðlaun í einstaklingskeppninni. Hann fékk i-Pod spilara í verðlaun og viðurkenningarskjal. Auk þess fengu hann og bekkjarfélagar hans í 10. bekk USB-lykil og bók að gjöf. HDH |