Laugardaginn 24. maí sl. voru vortónleikar Tónskóla Djúpavogs haldnir í Djúpavogskirkju. Að venju lék veðrið við hvurn sinn fingur og dagskráin var fjölbreytt og skemmtileg. Yngstu nemendurnir hófu leikinn og spiluðu á gítara, trommur, klarínett, píanó, þverflautu o.fl. Nemendur á miðstigi tóku síðan við og spiluðu mörg áheyrileg lög. Elsti hópurinn endaði tónleikana að venju og er frábært að sjá og heyra “stóru strákana hans Svavars.” Þeir eru búnir að vera undir hans verndarvæng sl. 8 ár og er ótrúlegt hvað þeir eru orðnir flinkir og flottir tónlistarmenn.

Að tónleikunum loknum afhenti sveitarstjóri Djúpavogshrepps Svavari blómaskreytingu, því eins og alkunna er, voru þetta síðustu tónleikar hans í tónskólanum. Ekki var laust við að sæjust tár á hvarmi víða í salnum enda við hæfi að kveðja snillinginn með hjartnæmum kveðjum.
Djúpavogsbúar þakka Svavari kærlega fyrir hans framlag til tónlistar í sveitarfélaginu og óska honum og Silvíu alls hins besta í framtíðinni. HDH